Balafirên şer ên Rûsya û rêjîma Sûrî doh bi dijwarî li bargeheke artêşa Tirk dan..
Li gorî encamên pêşî, di êrişê de 34 eskerên Tirk hatin kuştin, bi dehan esker jî birîndar bûn e..
Piştî vê êrişê, artêşa Tirk bi top û çekên giran êrişî çeperên hêzên rêjîma Sûrî kir..
Doh herêma Idlibê veguherî meydana şer û êrişên dijwar..
Pêşî danê sibê artêşa Tirk tevî çeteyên El Nusra êrişî artêşa Sûrî kirin..
Di encamê de bajarokê Seraqib û gundewarên wê, ji aliyê artêşa Tirk û çeteyên wê ve hatin dagirkirin..
Berê êvarê jî artêşa Sûrî bi desteka balafirên şer ên Rûsyayê dest bi operasyoneke mezin kir..
Balafirên şer ên Rûsya û artêşa Sûrî li derdora herêma Belyûn a dikeve Başûrê Idlibê, baregeheke artêşa Tirk bombardiman kirin..
Di encamê de nêzî 40 eskerên Tirk hatin kuştin û bi dehan jî birîndar bûn..
Rêveberiya rêjîma Tirk jî li kuştina 33 eskerên xwe mukir hat..
Lê çavkaniyên nexweşxaneyên li Hatayê ragihandin ku hejmara eskerên hatine kuştin zêdetir e..
RÛSYA: ESKERÊN ARTÊŞA TIRK DI NAVA KOMÊN TERORÎST DE BÛN
Têkildarî êrişê, Wezareta Parastinê ya Rûsyayê bi daxuyaniyekê ev agahî parve kirin:
Li devera Belyûn, balafiran li navendên komên terorîst dan. Eskerên artêşa Tirk jî li wê herêmê cihê xwe di nava terorîstan de digrtin.
Wezareta Parastinê ya Rûs ragihand ku dewleta Tirk ji hebûna eskerên xwe ên li wê herêmê wan agahdar nekiribû..
