Nêrazîbîyîşê verva, bicakerdişê cemeet û terîqetan Dersime de, zêdîyenê.
Komele û Sazîyanê Elewîyan êy Îzmîrî, verva nêy polîtîkayanê şerrê taybetî êy îqtîdarî, eşkerayîyêka çapemenîye ro dar viste.
Di eşkerayî de ame vatiş; Bawerî û cografîyaya Dersime bêwayire nîya.
Komeleyanê Dersime êy Îzmîrî derheqê bicakerdişê cemeet û terîqatan Dersime de, eşkerayîyêka çapemenîye ro dar viste.
Serokê Komeleya Dersime ya Îzmîrî Aslan Sûltan, Serokê Komeleya Dersimijan Bariş Çelîk, Temsîlkarê Federasîyona Meclîsanê Sosyalîstan,
Serokê Keyeyê Cemî Narlidere Mûstafa Aslan, Serokê Keyeyê Cemî yê Yamanlare Mehmet Bozkûrt, Hemserokê Komeleya Elewîyê
Demokratîkan Şûbeya Îzmîrî Nebahat Çelîke û Pîranê Ocaxa Kureyşan ra Hamza Takmaz tewrê eşkerayîya çapemenîye bîy.
Nameyê sazîyan sero Serokê Komeleya Dersimijan ya Bornova, Bariş Çelîkî qisey kerd.
Çelîkî vîndîkerdişê Gulîstan Dokûye vist vîrî û vat,
Wazenê Dersime, di bin nameyê esnafan de, teslîmê çeteyanê maddeyê heşberan û tecawizkaran bikerê û wina dewam kerd.
Verva Dersîme destpêka Komare ra na heta polîtîkayêka taybete yena rayirberdene.
Seba Dersime qanûnêy taybetîy amey vetiş û polîtîkayaê asîmîlasîyon û qirkerdişê çandî, bawerî û fîzîkî amey pêkardene.
Çelîkî vat;
Perrêke de xozaya Dersime yena talankerdiş, perrêke de mekanêy pîrozîy yenê texrîbkerdene û perrêke de zî dew û taxanê Elewîyan de bi darê zore camîy yenê înşaakerdiş.
La her halde fehm kerd ke di nêy polîtîkayanê xo de bi ser nêkewtîy, nika zî cemeet û terîqetîy vistîy dewreye ê wazenê cemeet û terîqetan Dersime de bi ca bikerê.
Bi xebatanê Navenda Rogêrayişan ya Dersime vecîya orte ke,
Nika Dersime de bi desan cemeet û terîqetîy bi destê dewlete û îqtîdarî ameyê bicakerediş.
Na rewşe polîtîkayanê dewlete û îqtîdarî ra cîya nîya.
Çelîkî vat gere her kes bizano ke bawerî, xoza û çandê Dersime bêwayir nîyê û do şarê Dersime nêy polîtîkayanê şima bi tu awayî qebûl nêkero.
Çelîkî veng ro heme elewîyan û dormeyê demokratîkan kerd ke verva nêy polîtîkayan helweste nîşan bidê û tekoşîne berz bikerê.
