Çalakîya Malbata Gulîstan Dokû ke 249 rocî yo ci ra agahîye çînya, Dersime de dewam kena.
Di çalakîya Meydanê Seyît Rizayî ya Dersime de, Daye Bedrîye Dokûye veng ro verpersîyaran kerd vat; Kênaya min bivînê.
Wendekara Zanîngeha Mûnzûrî Gulîstan Dokûye ra 249 rocîy o xebere nîna girotene.
Malbata Dokûye bi sebebê dîyiş û cipersayişê derheqê gumandaran de, dest bi çalakîya roniştişî kerd.
Çalakîye di roca 3’ine Meydanê Seyîd Rizayî yê Dersime de dewam kena.
Di roca yewîne ya çalakîye de daye û waya Gulîstan Dokûye hetê polîsan ra amey binçimkerdene.
Badê veradayişî, malbate reyna amey meydan û çalakîya xo domnena.
Seba Gulîstane Komîsyona Edaletî, Platformê Cînîyan yê Dersime, Parlamentera HDP ya Stembole Dilşat Canbaz, Şaredarê Dersime Fatîh Mehmet Maçoglû û Serokê Baroya Dersime Kenan Çetîn zî seba paştîdayişê malbate meydan de bîy.
Malbate nêrazîbîyişê xo êy verva helwesta polîsan û dewlete ardîy ziwan û vat,
Mijare yena bincilkerdene û hema derheqê gumanbar Zaînal Abarakovî de, tu çîyêke nîyameyo kerdene.
Gere serdozger eşkerayîyêke bido û sebebê na xemsarîye raya pêroyî rê, eşkera bikero.
Seba Dokûye bajaranê cîyayan de çalakîyê cînîyan est bîy.
Stembol de Cînîy verê Operaya Sureyya ya Kadikoye de amey pêhete û eşkerayî da.
Eşkerayî hetê Endamê Komîsyona Seba Gulîstan Dokûye Edalet, Hîvda Selene ra amî wendene.
Cînîyan helwesta polîsan ya verva malbate şermezar kerd û veng ro verpersîyaran kerd ke, cipersayişêko cîddî bikerê.
Adana de zî endamanê Platformî bi heman mexsed amey pêhete û eşkerayî da.
Eşkerayî hetê endama Platformî Sevîl Araci Beke ra amî kerdene.
Di eşkarayî de ame vatiş ke do tekoşîna edaletî ya seba Gulîstan Dokûye ra fek vera nêdê.
Bi heman mexsedî Îzmîr de zî meydanê Alsancake de çalakîya cînîyan este bî.
Parlamentera HDP ya Mûşî Gulîstan Kiliç Koçyîgîre û rayiberê HDP êy bajar û şarçeyan zî tewrê çalakîye bîy.
Eşkerayî hetê Rengîn Ogûze ra amî wendene.
Parlamentera HDP Gulîstan Kiliç Koçyîgîte zî veng ro verpesîyaran kerd ke gamêke raver Gulîstan Dokûye bêro dîyiş.
