RÛNIŞTINA DOZA SEBAHAT TUNCEL Û GULTAN KIŞANAK
DADGERAN DÎSA HIQÛQA DIJMIN PÊK ANÎ Û RÛNIŞTIN TALOQÊ 26’Ê SIBATÊ KIRIN
Rûniştina doza siyasetvanên jin ên Kurd Sebahat Tuncel û Gultan Kişanak li 5’mîn Dadgeha Cezaya Giran a Meletiyê pêk hat.
Sebahat Tuncel û Gultan Kişanak ji Girtîgeha Kandira û parêzerên wan jî ji Amed û Mêrsînê bi sîstema deng û dîmen beşdarî rûniştina dozê bûn.
Di serî de Sebahat Tuncel axivî, bal kişand ser zext, binpêkirin û hiqûqa dijin a dewleta Tirk û anî ziman ku di dema serde-girtinan de ewraq û belgeyên wan hatine desteserkirin.
Sebahat Tuncel diyar kir ku dosyayên wan li gorî hiqûqa dijmin hatine amadekirin û bêyî lêkolînê çi hatibe ber destê dozger, kirina nav dosyayê.
Sebahat Tuncel piştigiriya ji bo grevên birçîbûnê ya li zinanan anî ziman, 3 jinên Kurd ên li Silopiyê hatibûn kuştin bîr anîn û got:
Dewleta Tirk siyasetvanên Kurd wekî dijmin dibîne. Li gorî wê tevdigere. Di vê rewşê de emê çawa parastina xwe bikin û wê çawa edelet pêk were?
Dûre jî Gultan Kişanak axivî û diyar kir ku dema serde-girtinê hemû belgeyên wan hatine desteserkirin, der barê îdîayên sûcdariyê de ti agahî destê wê de nîne û lewma jî wê nikaribe parastinê bike.
Gultan Kişanak anî ziman ku sûcdariyên li dijî wan hemû wekî hev in û dûrî rastiyêne û got:
Wekî mînak ti hesabê min ê medya civakî nîne. Lê hûn rabûne ji ber tiştê nîne, doz vekirine û sûcdariyan dikin.
Dûre jî parêzer Mehmet Emîn Aktar û Cîhan Aydin axivîn, yek bi yek bêhiqûqî destnîşan kirin û gotin ku, dadger wekî dadgeran tevnagerin.
Heyeta dadgehê jî, wekî hertim guh neda daxwazan û ji bo temamkirina kêmasiyên dosyayê rûniştin taloqê 26’ê sibatê kirin.