هاوکاری سیاسەتی داگیرکاری تورکیا کاردانەوەی لێدەکەوێتەوە
بەیاننامەکەی دوێنێی کەجەکە دەربارەی بارودۆخی زینی وەرتێ و بۆردوومانەکانی دەوڵەتی تورک لە زینی وەرتێ و کامپی مەخمور کە باس لە هەماهەنگیی پارتی دیموکراتی کوردستان -عێراق دەکات لە پیلانەکانی دەوڵەتی تورکدا، کاردانەوەی بەدوای خۆیدا هێنا.
بەپێی بەیاننامەکەی دوێنێی کەجەکە لە خاڵی هێزەکانی پارتییەوە لە زینی وەرتێ زانیاریی لەسەر شوێنی گەریلاکان ئاشکراکراوە و لەلایەن دەوڵەتی تورکەوە بۆردوومان کراوە، کەجەکە ئەوەشی ئاشکراکردووە، کە پارتی و تورکیا ڕێککەوتوون بۆ گەمارۆدانی قەندیل و بردنی هێزیش بۆ زینی وەرتێ لەلایەن پەدەکەوە ڕاگەیاندنی شەڕە دژی گەریلا.
لوقمان وەردی، ئەندامی پەرلەمانی هەرێمی کوردستان لە فراکسیۆنی یەکێتیی نیشتمانیی کوردستان لەبارەی ئەو بەیاننامەیەی کەجەکەوە بۆ ڕۆژنیوز دەڵێت: ئومێدەوارم شەڕی ناوخۆ جارێکی دیکە ڕوونەداتەوە، چونکە پەشیمانی لەدوایە و ئەوەشی زەرەمەند دەبێت هەموو هێزە کوردییەکان و پرسی کورد دەبێت.
هەرلەبارەی ئەوەی کە کەجەکە دەڵێت لەلایەن پەدەکەوە شوێنی گەریلاکانیان لە زینی وەرتێ ئاشکراکراوە، ئارام حاجی، مافناس و توێژەر گوتوویەتی: ئەوە ئەوە دەگەیەنێت کە هێزێکی سیاسیی باشوری کوردستان تێوەگلاوە لە پێدانی زانیاریی سەبارەت بە شوێنی گەریلاکانی پەکەکە، ئەمەش سەربارکردنی خیانەتێکی دیکەیە بۆ سەر هەموو ئەو خیانەتانەی دیکە.