Wekîlê Îmarata Êzidiyan a Cîhanê, piştî mirina Şêx Xorto Ismaîl Hacî bi erêkirina Mîrê Êzidyan, endamên Meclisa Ruhî û hejmareke mezin a rûspiyên êzidyan, Elî Ilyas Nasir wekî Bavê Şêx yê nû pejirand.
Bavê Şêx Xorto Ismaîl bi temenê 87 saliyê di Cotmeha borî de li nexweşxaneyeke Hewlêrê jiyana xwe ji dest dabû.
Li gorî urf û adetên ola Êzidiyatiyê, Meclia Ruhî û mîrê Êzidiyan piştî mirina Bavê Şêx 40 rojî disekinin ku di wê demê de nabe Bavekî Şêx ê nû bê hilbijartin. Di wê demê de rê ji kesên alim û qedir bilind ên di nava êzdiyan de, tê dayîn heke piştî 40 rojan tu kesên bi wê rengî derneketin, wê demê Meclisa Ruhî û mîrê Êzidiyan kesekî ji malbata Bavê Şêx Îsiyanî û malbata bavê Şêx Şêxikî hildibijêrin.
Her car, Bavê Şêx ji malbatekê ji van her malbatên neviyên Şêx Fexir El-Dîn tê pejrandin. Nexasim mirîdên (kesên bi ser wan ve) tine ne. Di hilbijartinê de hevsengî di navbera her du malbatan de pêk tên û taybetmendiyên olî yên kesê tê hibijartin jî di ber çavan re tên derbaskirin.
Îro, wekîlê Îmarata Êzidiyan a Cîhanê mîr Cehor Elî Beg ragihand ku piştî civîna şêwirmendiyê ya li hola kongreyan a li bajarê Dihokê yê Başûrê Kurdistanê, Elî Ilyas Nasir wekî Bavê Şêx hatiye pejrandin. Ew kurê mezin ên Bavê Şêx Ilyas e ku beriya Bavê Şêx Xorto Ismaîl peywira Bavê Şêx girtibû.
Li gorî ola Êzidiyatiyê, tê payîn ku roja çarşemê (18`ê Mijdarê) li Laleşê bi awayekî fermî peywira xwe bigire.
Hêjayî gotinê ye ku piştî mîrê Êzidiyan, Bavê Şêx peywira duyem a herî bilind di ola Êzidiyatiyê de ye û lêvegera olî ya di rê û resmên ola Êzidî ye, bi taybetî li Laleşê di rojên cejnan de. Her wiha mecliseke taybet girêdayî Bavê Şêx heye ku di kar û barên olî û hin merasiman de alîkariya Bavê Şêx dike û pê re li nava êzidiyan digere.
