Rojavayê Kurdistanî de wextêko dergo, maberê hêzanê Kurdan de pêdîyişîyêy yewrêzîye pêk yenê.
Endamê Desteya Rayirbere ya Hemserokatîya PYD Aldar Xelîlî derheqê nêy pêdîyişan de Ajansa Haware rê qisey kerd.
Aldar Xelîlî vat; mexsedê ma tewrê pêvajoye-kerdişî yê heme hêzanê Kurdan o.
Endamê Desteya Hemserokatîya PYD Aldar Xelîlî, derheqê pêdîyişanê yewrêzîya hêzanê Kurdan, helwesta ENKS û Têgêrayişê PDK ya dormeyê sînorî de,cewbê persanê Ajansa Haware day.
Aldar Xelîlî derheqê pêdîyişanê gama 2’ine de, nêy vatîy.
Di na pêvajoye de hîrê mijarê ma êy muhîmî agêrayiş, rayirberî û pawitiş, est bîy.
Derheqê agêrayişî de ma şikenê vacê, astengîy nêmendê.
Ma waşt heme perrîy di rayirberîye de ca bigerê û erkê na rayirberîye o yo ke, temsîlkarîya kurdan bikero.
Zê prensîbî ma pê kerd ke, her perr bi maronê se ra 40’î tewrê agêrayişî bibo.
Maronê se ra 20’î zî do hetê PNYK û ENKS ra bêro dîyarkerdiş.
Derheqê nîqaşanê awankerdişê rayirberîye de zî Aldar Xelîlî nêy vatîy.
ENKS wextêko derg o, teberê hereme de ya. Seba ke tewerê rayirberîye bibo nîqaşêy verhîray amey kerdene.
Seba naye zî ma dî ke gere di serre de weçînayişî pêk bêrê û bi goreyê encamanê weçînayişî do ENKS awayê tewerbîyişê Rayirberîya Xosere dîyar bikero.
La rayirberanê ENKS vat; do weçînayiş nika seba înan zehmet bo.
Zê çareserîye ma nika hewl danê ke verîya weçînayişan ENKS tewrê rayirberîye bikerê.
Xelîlî vat; Gere nêro vîrîrakerdiş ke rayirberîye tenê ya kurdan nîya.
Na rayirberîye bi kede û tekoşînêka pîle ya şaranê hereme ameya bidestvistişî de Kurd, Ereb, Suryan û Tirkmenî est ê. .
Mijarêy zê hemserokatî, azadîya cînîye, biratîya şaran û cuwîyeyo hembar rojdemê ma êy sereke yê.
Aldar Xelîlî vat, Badê bipeynîkerdişê nêy xalan êy do pêvajoya 3’ine mijaranê ewleyî û eskerî bigerê dest û wina dewam kerd.
Nêbeno ke di hereme de 2 hêzêy eskerî est bê.
Derheqê têkilîyanê ENKS êy bi Tirkîya reyde zî Xelîlî nêy vatîy.
Têkilîyê înan hema zî dewam kenê. ENKS endamêka Îxtîlafê Sûrîya ya.
Seba naye ez bawer nêkena ke nika helwestêke verva naye nîşan bido.
ENKS hewl dana ke meseleyanê giredayeyê Îtîlafê Sûrîya û Tirkîya ra dûrî bikewo.
Îtîya de gere na raştîye zî nêro vîrîrakerdiş, di wextêko ke ma kewtê mîyanê hewldananê pêkardişê yewrêzîya Kurdî, dewleta tirke êrîşê hêzanê şoreşgeran êy koyanê Kurdistanî kena û Vaşûrê îşgal kena.
Di rewşêka winayine de sînorê Vaşûr û Rojavayî sero, têgêrayişê pêşmergeyan est o.
Ya raşte ma nêzanenê, sebebê na ye çi yo?
Hîvîyê ma cîya bîy la çîyo ke ewro perrê Vaşûrî de qewemîyenê, verapeyê naye yê.
