Desteya Rayirbere ya HDP bi wesîleya “1’ê Mijdare Roca Kobanê” eşkerayîyêka nûştekî vila kerde.
HDP di eşkerayîya xo de vat; “Xoverdêrîya Kobanê şaranê dinya rê bî çimeyê îlhamî”
Partîya Demokratîke ya şaran HDP bi wesîleya 1’ê Mijdare Roca Kobanê ya Dinya Eşekrayîyêka nûştekî bi raya pêroyî reyde barre kerde.
Eşkerayîya HDP wina ya.
Kobanê, na ra 6 serrîy raver, verva DAÎŞ’î, 133 rocîy seba azadî û erjanê merdimayîye xoverdêrîyêka destanî nîşan da.
Na artêşa qatil û tecawizkaran, ke hetê hêzanê heremî û hegemonîkan ra, belayê serreyê merdimayîye amîbî kerdiş, Kobanê de têk şî û bi awayêko fîzîkî amî bipeynîkerdene.
Şaranê dinya, şahidîya na xoverdêrîya destanî ya ciwan û cînîyanê Kurdan kerde.
Bi no sebeb 1’ê Mijdare bi rihêko enternasyonalîst, zê Roca Kobanê ya Dinya amî îlankerdene.
Ma zê HDP di serragêrayîya 6’ine de na xoverdêrîya destanî û rihê paştîdayişê enternasyonalî yê şaranê dinya, silam kenê û 1’ê Mijdare Roca Kobanê ya Dinya, dorêka bîne firaz kenê.
DBP zî bi eşkerayîyêka nûştekî, 1’ê Mijdare Roca Kobanê ya Dinya firaz kerde.
DBP di eşkerayîya xo de vat;
Qetlîam û qirkerdişo tewir pîl yê serrêy peyênan, Vakûr û Rochelatê Sûrîya de pêk ame.
Di no wexto ke zilm resa erşan, tekoşîna hembare ya Şaran ro xoverdêrîyêka destanî agêra.
No destan bi kila canê Arîn Mîrxan û Parmaz Kizilbaşan, bi mijdîyanîya serkewtişî.
Tekoşîna destanî ya şaran mexsedê kesanêy ke vatê ” Kobanê kewtişî sero yo”, qirika înan de verda û bi şoreşa cînîye.
Na Şoreşa Cînîye û destkewteyê aye, ewro bîyê omûdê merdimayîye.
Bi no sebeb zî hetê Şaranê dinya ra 1’ê Mijdare, zê Roca Kobanê ya Dinya amî dîyarkerdene.
Ma kesanêy ke, seba xuliqnayişê na roca canê xo feda kerd, dorêka bîne bi rêzdarî û minnet bi vîr anê û na roce ro heme şaranê dinya firaz kenê.
KONGREYA DEMOKRATÎKE YA ŞARAN HDK
“SERKEWTIŞÊ KOBANÊ XEYALÊ AKP TÊK BERDÎY”
Kongreya Demokratîke ya Şaran HDK zî bi heman mexsedî eşkerayîyêka nûştekîye da.
HDK di eşkerayîya xo de vat: Xoverdêrî û serkewtişê Kobanê bi sembolê verva zilm, hovîtî û tekoşîna şaran ya verva bindestîye.
Reyna bi xoverdêrîya Kobanê ame nîşandayiş ke verva ferasetê netewdewletî yê qirker û asîmîlasyonîstîy cuwîyeyêko bîn yo xoser yo têreyde-cuwîyayişê şaran pêkan o.
Di eşkerayî de ame vatiş bi serkewtişê Kobanê xeyalê AKP yê hegemonîyaya Rochelatê mîyanênîy pûç bîy.
