SALVEGERA 8’AN A KOMKUJIYA PARÎSÊ
“ÎDEOLOJIYA RIZGARIYA JINAN, ÇARESERIYA PIRSGIRÊKAN HEMÛYAN E”
Koordînasyona Kongreya Star û Saziya Malbatên Şehîdan a Ewropayê di salvegera komkujiya Parisê de hersê jinên şehîd bibîr anîn.
Saziyên kurdan bang li edaleta Fransayê kirin ku komkujiyê ronî bike û dewletên komploger derxe holê.
Koordînasyona Kongreya Star bi daxuyaniyekê sê jinên şoreşger Sakîne Cansiz, Fîdan Dogan û Leyla Şaylemez bibîranîn.
Di daxuyaniyê de komkujî weke hewldana têkbirina şoreşa jinan hat binavkirin.
Qetilkirina Hevrîn Xelef, Amara Rênas, Zehra Berkel, dayê Aqîde, Emîne Weysî, Hebûn Xelîl û gelek jinên din li Rojavayê Kurdistanê û bakur rojhilatê Sûrî weke dewama vê komkujiyê hatin pênasekirin.
Di daxuyaniyê de hat destnîşankirin, ku îdeolojiya rizgariya jinan çareseriya pirsgirêkan hemûyan e û banga mezinkirina têkoşîna ji bo vê îdeolojiyê hat kirin.
Saziya Malbatên Şehîdan a Ewropayê-KOMAWê jî bi daxuyaniyekê sê jinên şoreşger bibîranîn.
Di daxuyaniyê de bang li dewleta Fransa hat kirin, ku tavilê komkujiyê ronî bike.
Û wiha hat gotin:
Ji bo komkujiyên bi vî rengî rû nedin, li pêşiya Kurdan tenê rêyek heye; ew jî xwedîderketina li têkoşînê û mezinkirina wê ye.