Verkêşamê Têgêrayîşê Ciwanan ra yew, Leyla Şaylemez a.
9’ê Çeleya 2013’ine paytexta Fransa Parîsî de, tewrê awankerdoxa PKK’yî ra yew Sakîne Cansiz û dîplomat Fîdan Doganî amî qetilkerdene.
Leyla wexto ke hetê MÎT’ê dewleta tirke ra bi fermanê Erdoganî amî qetilkerdene, hama 24 serrîye bî.
Zerrîye aye ya ciwan pirr bi lej û tekoşîne bi.
Ma nika portreya Gula Kurdistane Leyla ra biawnê….
LEYLA ŞAYLEMEZ – RONAHÎ
VERKÊŞA CIWANANÊ AZADÎYA KURDISTANE
Leyla Şaylemez 1’ê Çeleya 1989’ine de keyeyêke welapawêrî de amî dinya.
7 wa û birayê û Leyla domana 3’ine ya.
Eslê malbata aye Licê ya Amede ra ya.
Malbata Leylayem bi sebebê zextê dewleta tirk ya îşgalkere verê xo danê metropolanê Tirkîya.
Mersîn û Adana de bica benê.
Wexto ke malbata aye şina Mersîne, Leyla hama domana.
La zextê dewlete îtîya zî bipeynî nêbi.
Leyla ya 8 serrîye bi malbata xo dorêka bîne verê xo danê xerîbîye.
Verê xo danê Ewrupa…
Malbate wexto ke şinê Elmanya, çîyeke înan çinyo.
Bajarê Halle de, bi zor û zehmetan hewl danê domanê xo wey bikerê.
Malbate domananê xo bi çanda kurdî pîle kerdîy.
Leyla zî tewrê ke şina mektebe, komleya kurdî de, mîyan komanê folklore de ca girot
Gula Kurdistane Leyla, êdî cinîyêka ciwan bî.
Zanaybî çirê welatê xo ra vecîyay û ameye xerîbîye.
Zanaybî ke Kurdistane de çi qewimyeno.
Her ke cigêrayîşê aye pîle bîy, hêrsa aye zî pîle bîy.
Na pêvajoye de Leyla hêrsa xo açernay qerarêke.
Serra 2008’ine, di 19 serrîya xo de tewrê xebatanê ciwanan bîy.
Badê 2 serran, serra 2010’ine de verê xo dana koyanê azadan ey Kurdistane.
Koyanê azade de Leyla bî Ronahî.
Êdî gerîlaya azadîya Kurdistanî bî.
Wextêk welatî de mend û perwerde dîy.
Dimara agêray Ewrupa û kar û xebatanê ciwanan de ca girot û verkêşî kerd.
Leyla Şaylemez, agno Ronahî 9’ê Çeleya 2013’ine, paytexta Fransa Parîsî de tewrê Sakîne Cansiz û Fîdan Dogan amî qetilkerdene.
Ewro rayirê Leyla de, bi seyan ciwanê Kurd verva dewleta tirk ya îşgalkere, mîyan refanê tekoşîne de, bi nameye Sara Rojbîn Ronahî lej kenê.
Înan çikas lej kenê zî, wina zaf nêzdî xeyalanê azadî ey Ronahîyan, benê….
