Demêko dergo PDK derheqê Şengale û Şengalijan de propogandayêka tarî daya destpêkerdene û bi Bexda reyde mîyanê têkilîyan de ya.
9’ê Citmenge maberê PDK û Hikumatê Bexda de peymanêke amî viraştiş.
Temsîlkaranê Êzîdîyan nêrazîbîyşîy nîşan day û vat: Na plana dewamê fermanî, nîna qebûlkerdene.
PDK wextêko dergo verva Şengala propogandayêka qilêrine domnena û xo rê ro ortaxan geyrena.
Badê hemkarîya bi dewleta tirke reyde na dorê bi Bexda reyde kewte mîyanê têkilîyan.
Badê pêdîyişê dergan maberê PDK û Hukumatê Bexda de, bêke şarê Şengale ra bêro persayiş an zî fikrê înan bêro girotiş, peymanêke amî viraştene.
Temsîlkaranê Civatê Êzîdî; na peymane zê “peymana maberê sûcdar û îxanetkaran” bi name kerde.
wêneyan bi hev re
Derheqê na mijare û plananê PDK de Hemseroka Desteya Rayirbere ya Meclîsa Xosere Rahîm Hîço, Hemserokê NAV-YEKE Hecî Çelîk û Parlamenterê HDP Feleknas Ûca, ANF rê qisey kerd.
Rîham Hiçoye peymane zê Komploya verva Êzîdîyan bi name kerde û vat;
Na peymane verdewamê fermanê 3’yê Tebaxe ya. Hiçoye verpersîyarê êrîş û qetlîamê 3’ê Tebaxe, PDK û Hikumatê Îraqî nîşan day û vat; Hikumatê Îraqî sûcdar, PDK zî sûcdarîye reyde îxanetkar a.Tu heq û vatişêkê nêy her didi hêzan, ke seba Şengele vacê çîn yo.
Hîçoye, hewldanê şirawitişê peşmergeyanê PDK yê Şengale û êrîşê dewleta tirke êy verva Şengale zî vistîy vîrî û vat: Na peymane dewamê na hemkarîya PDK û dewleta tirke ya zî.
Hîçoye vat; Ma seba cuwîyeyêkê azadî bedêlêy giranîy day.Ma tu qerar û peymanêka bê îradeyê xo, qebûl nêkenê. Hêzanêy ke Êzîdî bi qetlîamê DAÎŞ’î reyde ribiri verday û ro Êzîdîyan îxanet kerd, ewro nêşikenê nameyê ma sero qeraran bigerê.
Hemserokê NAV-YEK’e Hecî Çelîkî zî nêy ardîy ziwan.
Ma vînenêy ke ewro reyna hêzanêy ke Êzîdî bi qetlîamî reyde ribiri verday, di
dewreye de yê. Êy ke gere hesabê qetilkerdişê Êzîdîyan, remnayiş û rotişê doman û cînîyan bidê, ze ke qet çîyêke nêbîyo, derheqê ma de qeraran danê û peymanan virazenê. No verdewamê qetlîam û fermanî yo. Ma do zê sazî û dezgeyanê Êzîdîyan dest bi çalakîyan bikerê û bi tu awayî na rewşe qebûl nêkerê.
Parlamentera HDP Feleknas Ûca zî; peymane zê çinêhesbnayişê îradeyê Êzîdîyan bi name kerde û wina vat.
Wazenê fermanê 3’ê Tebaxe ke nîmcet mendbi temam bikerê. Badê êrîşanê DAÎŞ’î mexsedê nêy hêzan bi temamî vengkerdişê Şengale bi. Na plana ke a roce pêk nîyamî wazenê ewro bi ca bîyarê. Gama ke ma na plane û êrîşanê verva Rojavayî fikirîyenê ma vînenê ke perçeyê heman konseptî yê. Ûca veng ro partîyanê YNK, Goran û partîyanê bînan kerd ke PDK senî şikena bêyî şima, qeraranê winayina bigero.