Ciyakarîya Dewleta tirke ya verva şarê Kurdî…
Rayvistina HDP ya Çewlîgî, bajare de xeylêk dewê elewîyan zîyaret kerdî.
Rayvistine da zanayene ke seba ke elewî yê, dewanê Karerî rê xizmet nêno kerdene, rayîrê dewan nêvirazîyenê.
Parlamenterê HDP yê Çewlîgî Erdal Aydemîrî bajare de xeylê dewê elewîyan zîyaret kerdbi.
Zîyaretî ra Erdal Aydemîrî eşkerayîyêke daye û pare kerd ke rayîrê dewan heta Karerî virazîyenê, la sînorê Karerî ra dima nêvirazîyenê.
Erdal Aydemîrî bale antbi ser ke seba ke nê dewî ê elewîyanê, înan rê cîyakerî yena kerdene.
Eşkerayîya HDPyî ra dima Bînaya Îdareyê Taybetî ya Çewlîgî muxtarê dewanê Karerî baxçeyê xo de ardî pêser û îdîa kerd ke vatişê Erdal Aydemîrî raşt nîyê û ê xizmet benê dewanê elewîyan.
Nîqaşan ra dima Rêxistina HDPyî ya Çewlîgî zî dewê elewîyan zîyaret kerdî û derheqê mesele de nê zanayîşî pare kerdî:
”Dewlete û îqtîdarî muxtarê dewanê Karerî ardî baxçeyê Bînaya Îdareyê Taybetî û bi zorî înan rê belgeyêk da îmzakerdene.
La aslê xo de vatişê Bînaya Îdareyê Taybetî raşt nîyê.
Ma zîyaretanê xo de tesbît kerd ke seba ke awa pake û awa kanalîzasyonî kewenê têmîyan tay kesî merdî, meseleyê awanîye estê, rayîrî nêameyî viraştene.
Rayîrî heta Karerî virazîyenê la rayîrê Karerî nêvirazîyenê. Na cîyakerîye ra berî çîyêk nîya.
Dewanê Karerî de ceyran vera birîyeno û Ocaxanê Weşîye de kêmîyê pîlî estê.
Ma sey Rêxistina HDPyî şarê ma yê Karerî zîyaret kerdî.
Ganî pêro partîyê sîyasîyî zî wina bikerê û goş bidê derdanê şarê Karerî.
Ma sey HDP têna wazenê ke hewcedarîyê şarê Karerî cade bêrê peydakerdene.”
